एजेन्सीः बेलायती विदेशमन्त्री लिज ट्रसले रूसले युक्रेनमा आक्रमण गरे नराम्रो परिणाम भोग्नुपर्ने चेतावनी दिएकी छन् । रूस भ्रमणमा रहेकी ट्रसले रूसी विदेशमन्त्री सर्गेई लाभरोभसँग युक्रेन संकटबारे मस्कोमा गरेको बैठकका क्रममा उक्त चेतावनी दिएकी हुन् ।
युक्रेन र रूसबीचको विवाद शान्त पार्ने अमेरिकी कदम असफल भएपछि रूससँगको वार्ताको जिम्मेवारी फ्रान्स र बेलायतले लिएका छन् । ट्रसको जवाफ दिँदै रूसी विदेशमन्त्रीले पश्चिमा मुलुकले रूसलाई उपदेश दिन नहुने जवाफ दिएका थिए। यसबाट वार्ताको सम्पूर्ण प्रक्रिया अवरुद्ध गर्न सक्छ।
ट्रसले रूसलाई युक्रेनको स्वतन्त्रता र सार्वभौमसत्ताको सम्मान गर्ने अन्तरराष्ट्रिय सम्झौताको प्रतिबद्धता पालना गर्न आग्रह गरिन् ।
बैठकमा कडा रूपमा प्रस्तुत भएका लाभरोभले पश्चिमा देशले रूसलाई उपदेश दिन नखोजून् भन्दै विरोध गरे । लाभरोभले पश्चिमा देशको पूर्वाग्रह र चेतावनीले रूस नतर्सने स्पष्ट पारे ।
बेलायत र रूसका विदेशमन्त्रीहरूको बैठकले पनि कुनै सकारात्मक नतिजा आउन नसक्ने देखिएको छ ।
ट्रसले पहिलेदेखि नै रूस विरोधी बयान दिँदै आएकी छिन् । उनले डिसेम्बरमा सम्पन्न जी–७ देशका विदेशमन्त्रीहरूको बैठकमा युक्रेनविरुद्ध सैन्य कारबाही ठूलो गल्ती हुने र रूसले नराम्रो परिणाम भोग्नुपर्ने चेतावनी दिएकी थिइन् ।
त्यसको दुई दिनअघि फ्रान्सका राष्ट्रपति एमानुएल माक्रोँ मस्को पुगेका थिए । उनले रूसी राष्ट्रपति भ्लादिमिर पुटिनसँग युक्रेनको विषयमा लामो वार्ता गरेका थिए ।
पश्चिमा शक्तिले रूसले आफ्नो सेना कहाँ र कसरी तैनाथ गर्ने भन्ने व्याख्या दिन खोजिरहेको भन्दै रूसले आक्रोश व्यक्त गरेको छ ।
उनले युक्रेनले सन् २०१५ को मिन्स्क सम्झौता अस्वीकार गरेर तनाव बढाएको आरोप लगाए। यस्तो अवस्थामा रूसलाई आफ्नो रक्षा गर्ने अधिकार छ ।
करिब ९० हजार रूसी सैनिक, भारी तोपखाना र ट्याङ्कसहित युक्रेनी सीमा नजिकै तैनाथ छन् ।
रूसले युक्रेनको सिमानामा ट्याङ्क, क्षेप्यास्त्र र अन्य हतियारसहित हजारौं सैनिक तैनाथ गरेको छ । अप्रिल २०२१ मा पनि रूसले युक्रेनको सिमानामा सेना र हतियार तैनाथ गरेको थियो ।