अदालतबाट न्याय पाउन नसकेको निहारिकाको गुनासो, दाषीले पाए उन्मुक्ति

0
104

काठमाडौँः महोत्तरीको जलेश्वर घर भएकी निहारिका राजपुतले अदालतबाट पनि न्याय पाउन नसकेको भन्दै गुनासो पोखेकी छिन् । जिल्ला अदालत धनुषाले आरोपी शिवराज श्रेष्ठलाई सफाइ दिएपछि अविवाहित आमा निहारिकाले फेसबुक लाइभमा आएर वेदना पोखेकी हुन् ।

अदालतको इजलास ५ का न्यायाधीश परशुराम भट्टराईले मुद्दामा अभियोग दावी नपुगेको ठहरसहित आरोपी श्रेष्ठलाई सफाइ दिएका थिए । अदालतका सूचना अधिकारी गंगाप्रसाद मिश्रले आरोपीले कसरी सफाइ पाए भन्ने कुरा फैसलाको पूर्ण पाठ आएपछि मात्र भन्न सकिने बताए ।

‘मेरो बच्चाले न्याय पाएन । मैले अदालतमाथि कसरी विश्वास गर्ने ?,’ निहारिकाले रुँदै भनिन्, ‘मैले यदि आत्महत्या गरेँ भने यसको जिम्मेवार जिल्ला प्रहरी कार्यालय धनुषा र अदालतका न्यायाधीश हुनेछन् ।’

निहारिका ३ वर्षीय छोरा लिएर हाल काठमाडौंमा बस्छिन् । उनलाई छोरा कसरी पाल्ने र आफू कसरी गुजारा गर्ने भन्ने चिन्ताले सताएको छ ।

न्यायाधीशमाथि आर्थिक चलखेलको आरोप

निहारिकाले अदालतका न्यायाधीशमाथि आर्थिक चलखेल गरेको आरोप लगाइन् । उनले न्यायाधीश र सरकारी वकिलले पैसा खाएर अपराधीलाई सफाई दिइएको बताइकी छिन् ।

‘अन्तिम पेशी भनेर म अदालत आउन खोजेकी थिएँ तर सरकारी वकिलले मलाई रोके’‚ निहारिकाले भनिन्, ‘पेशी सारिदिने भनेकी थिएँ तर सारेनन् । सरकारी वकिल र न्यायाधीश सबैले पैसा खाएर अपराधीलाई सफाइ दिए ।’

उनी अहिले अदालतबाट आएको निर्णयले विक्षिप्त बनेकी छन् । उनी न्याय पाउने आशा बोकेर कैयौंपटक जिल्ला अदालत धाएकी थिइन् ।

यस्तो छ, निहारिकाको दाबी
निहारिकाको दाबीअनुसार करिब ३ वर्षअघि श्रेष्ठले उनलाई प्रेमजालमा पारेर शारीरिक सम्बन्ध राखेका थिए । त्यसपछि उनी नाबालिग उमेरमै उनको गर्भ बसेको थियो । आफूमा गर्भ रहेको बताएपछि श्रेष्ठले विवाह गर्न नमानेको निहारिकाको भनाइ छ ।

आफूलाई आर्थिक प्रलोभन देखाएर गर्भको बच्चा फाल्न दबाव दिएको समेत बताइन् । निहारिकाले बच्चा जन्माइन् । अहिले छोरा ३ वर्षको भइसकेका छन् । उनी आफूलाई अविवाहित आमाको रूपमा चिनाउने गर्छिन् ।

आफ्नो वास्तविक नाम र तस्वीर सार्वजनिक गर्न उनले मिडियालाई अनुमति समेत दिएकी छिन् । आरोपी श्रेष्ठले भने निहारिकाबाट जन्मेको बच्चा आफ्नो नभएको बताए । अदालतमा मुद्दा परेपछि उनी करिब १८ महिनासम्म फरार भए ।

त्यसपछि प्रहरीमार्फत हाजिर भएका उनी थुनामा रहेका थिए । अदालतको फैसलापछि उनले उन्मुक्ति पाएका हुन् ।

अविवाहित आमा बनेरै बाँच्ने तर अपराधीलाई कानुनी कठघरामा उभ्याएर छाड्ने भनेर अदालत पुगेको अवस्थामा अदालतको फैसलाले आफू निराश बनाएको बताइन् ।

LEAVE A REPLY

Please enter your comment!
Please enter your name here