काठमाडौंः अब विदेशमा रहेका नेपाली दूतावासबाट समेत विद्युतीय राहदानी (ई–पासपोर्ट) जारी हुने भएको छ ।
कतारको राजधानी दोहामा रहेको नेपाली दूतावासले सोमबार नेपालबाहिर पहिलो पटक सबै विवरण/आवेदन राहदानी विभागमा पठाएपछि ई–पासपोर्ट जारी गरेको विभागले जनाएको छ ।
राहदानी विभागले सोमबार ई–पासपोर्टका लागि कतारस्थित नेपाली दूतावासबाट आवेदन भर्न सकिने सूचना जारी गरेको छ ।
विभागका निर्देशक शरदराज आरनले नेपाली दूतावासहरूबाट ई–पासपोर्ट जारी गर्न खाडी देशहरू र मलेशियास्थित नेपाली नियोगमा आवश्यक सबै उपकरण पठाइसकेको बताए ।
तत्कालका लागि सीमित मात्रामा ई–पासपोर्टका लागि आवेदन लिइने जानकारी पनि विभागले दिएको छ ।
ती सबै उपकरण दूतावास र नियोगमा जडान हुनासाथ केही दिनभित्रै ती देशमा रहेका नेपालीलाई ई–पासपोर्ट जारी गर्न सकिने छ ।
विभागका अनुसार अन्य देशमा रहेका नेपाली नियोगमा पनि आवश्यक उपकरण पठाइरहेको र केही सातामै ती नियोगबाट समेत ई–पासपोर्ट जारी हुने छ ।
देशभित्र भने ३६ वटा जिल्ला प्रशासन कार्यालय र ५ वटा इलाका प्रशासन कार्यालय गरी ४१ ठाउँबाट ई–पासपोर्टको आवेदन दिन सकिन्छ ।
बाँकी जिल्लामा आवेदन शुरु गर्न विभागका ३ प्राविधिक टोलीले नेटवर्किङ, उपकरण जडानसँगै कर्मचारीलाई तालीम दिइरहेको विभागले जनाएको छ ।