सन्देश घले
सिन्धुली – हरिहरपुरगढी गाउँपालिका–१ मा स्थानीय राजनीतिक परिदृश्यमा उल्लेखनीय परिवर्तन आएको छ। नेपाली कांग्रेस र एमाले लगायत अन्य विभिन्न पार्टी परित्याग गरी ३१ जना स्थानीयहरुले नेकपा ९माओवादी केन्द्रमा औपचारिक प्रवेश गरेका छन्।
प्रवेश गर्नेहरुमा नेपाली कांग्रेस हरिहरपुरगढी गाउँ कमिटीका सक्रिय सदस्य टिका बहादुर घलान र टेकबहादुर घलान, नेकपा एमाले गाउँ कमिटी सदस्य प्रेम बहादुर घलान र हरि बहादुर घलानको रहेको छ।
राजनीतिक रूपमा सक्रिय व्यक्तित्वहरूको यस प्रकारको प्रवेशले स्थानीय तहमा माओवादी केन्द्रको प्रभाव अझ सुदृढ हुँदै गएको छ।
शनिबार चिसापानीमा आयोजित एक भव्य कार्यक्रमका बीच माओवादी केन्द्रका केन्द्रीय सदस्य तथा प्रतिनिधिसभा सदस्य माननीय लेखनाथ दाहाल (राजन) बागमती प्रदेश सदस्य एवं गाउँपालिकाका अध्यक्ष बज्रध्वज वाइबा, गाउँ कमिटी अध्यक्ष अजित ठाडा मगर र कोषाध्यक्ष रमेश घलान कार्साङ लगायत नेताहरूले नवप्रवेशीलाई अबिर र फूलमालासहित स्वागत गरेका थिए।
कार्यक्रमलाई सम्बोधन गर्दै सांसद लेखनाथ दाहालले पार्टीमा प्रवेश गर्ने सबै सदस्यलाई पार्टीभित्रको अनुशासन, समान व्यवहार र दायित्वमा आधारित भूमिकाको प्रतिबद्धता जनाउन आग्रह गरे । उनले भने “माओवादी पार्टीभित्र कसैलाई विभेद गर्ने, हेप्ने संस्कार छैन। यहाँ सबैलाई इज्जतका साथ अगाडि बढ्न सकिन्छ।ू
नेता दाहालले नवप्रवेशीलाई संगठनभित्र सम्मानजनक जिम्मेवारी दिइने समेत बताए ।
त्यसैगरी गाउँपालिका अध्यक्ष वाइबाले माओवादी नेतृत्वमा सञ्चालन भइरहेका विकास र जनमुखी कार्यक्रमहरूले स्थानीय जनतामा विश्वास सिर्जना गरेको उल्लेख गर्दै भने, “कामबाट प्रभावित भएर माओवादी केन्द्रप्रति आकर्षण बढ्नु स्वाभाविक हो। अब नयाँ र पुराना सबै सदस्य मिलेर संगठनलाई थप बलियो बनाउने जिम्मेवारी हामी सबैको हो।”
पार्टी प्रवेश गरेकाहरूले माओवादी केन्द्रको विचार, सिद्धान्त र जनतासँगको नाता प्रतिवद्ध भएर आत्मसात् गरेको बताउँदै देश र जनताको हितका लागि निःस्वार्थ सेवा गर्ने अठोट व्यक्त गरेका छन ।
यस प्रकारको सामूहिक प्रवेशले हरिहरपुरगढीमा आगामी स्थानीय चुनावलगायत राजनीतिक समीकरणमा नयाँ तरंग ल्याउने अनुमान गरिएको छ।
