काभ्रे : काभ्रेपलान्चोक जिल्लाको खानीखोला गाउँपालिका जगथलिमा आयोजित राष्ट्रपति रनिङ शिल्ड प्रतियोगिता २०८१ मा कुमारी माध्यमिक विद्यालयले उत्कृष्ट प्रदर्शन गर्दै उपाधि जितेको छ । प्रतियोगितामा गाउँपालिकाभरका माध्यमिक तहस्तरीय ८ वटा र १ वटा आधारभुत तहस्तरीय विद्यालयको सहभागिता रहेको थियो ।
कुमारी माध्यमिक विद्यालयका विद्यार्थीहरूले सबैलाई पछाडि पार्दै निर्णायक अग्रता हासिल गरेको हो । विद्यालयका प्रशिक्षक र शिक्षकहरूको मेहनत र विद्यार्थीहरूको लगनशीलताले यो उपलब्धि सम्भव भएको बताइएको छ ।
१६ स्वर्ण, ८ रजत र ७ कास्य प्राप्त गरी कुमारी माध्यामिक विद्यालय प्रथम, ४ स्वर्ण, ५ रजत, १० कास्य प्राप्त गरी जन विकास मावि दोस्रो र २ स्वर्ण, २ रजत, ४ कास्य प्राप्त गरी बुद्ध मावि तेस्रो भएको व्यवस्थापक कुमारी माविका शिक्षक प्रधानाध्यापक लाल बहादुर घिसिङले बताउनुभयो ।
समापन समारोहमा गाउँपालिका प्रशासकीय अधिकृत होमनाथ दाहालले विजेता टोलीलाई ट्रफी, मेडल, र प्रमाणपत्र प्रदान गर्दै उनीहरूको उत्साह बढाएका थिए। उनले खेलकुदले विद्यार्थीहरूमा शारीरिक तथा मानसिक विकास मात्र नभई सहकार्य र अनुशासनको भावना पनि विकसित गराउने बताए ।
प्रतियोगितामा सहभागी अन्य विद्यालयहरूले पनि आआफ्ना खेलाडीहरूको प्रदर्शनबाट प्रशंसा प्राप्त गरे । प्रतियोगिताले स्थानीय स्तरमा खेलकुदको प्रवर्द्धन गर्न र विद्यार्थीहरूलाई नयाँ अवसरहरू प्रदान गर्न महत्वपूर्ण योगदान पुर्याएको छ ।
खानीखोला गाउँपालिका खेलकुद विकास समितिका संयोजक प्रेमप्रकाश लामाको अध्यक्षतामा सम्मन्न भएको उद्घाटन कार्यक्रमको सञ्चालक कुमारी माविका प्रधानाध्यपक लाल बहादुर घिसिङले गरेका थिए ।
प्रतियोगिताको समापनमा गाउँपालिकाका प्रमुख प्रशासकीय अधिकृत होमनाथ दाहालले सबै विजेताहरुलाई परस्कार वितरण गरेका थिए ।कार्यक्रममा वडा न: ४ का अध्यक्ष निशान मोक्तान , वडा ५ का अध्यक्ष बुद्धि बहादुर स्याङ्तान ( बाबू) शिक्षा शाखा सहजकर्ता होम बहादुर वाईबा लगाएत विभिन्न दलका प्रतिनिधि शिक्षक अभिभावकहरुको उपस्थितिमा समापन भएको थियो ।
