काभ्रे : काभ्रेपलाञ्चोक जिल्लाको बेथानचोक गाउँपालिका वडा नं ६, भुग्देउ सिउरानीका स्थानीय बासिन्दाहरूलाई अहिले पानीको समस्या गम्भीर रुपमा भोग्नुपरेको छ।
असोज ११ र १२ गते आएको बाढीपहिरोले स्थानीय जलस्रोत र खानेपानी आपूर्ति प्रणालीलाई ध्वस्त पारेपछि यहाँका बासिन्दाहरूको दैनिक जीवन अत्यन्तै कठिन बनेको छ। यस क्षेत्रको प्रमुख खानेपानीको स्रोत बाढीले बगाउँदा बासिन्दाहरूले आफ्नो आवश्यकताका लागि निकै लामो दूरी पार गर्दै पानी खोज्नुपर्ने बाध्यता छ।
पहिले यहाँको पानीको आपूर्ति प्रणाली राम्रो थियो, जसले गर्दा स्थानीयहरूलाई पानी लिनको लागि धेरै समस्या हुँदैनथ्यो। तर, बाढीपहिरोले संरचनात्मक क्षति पुर्याएपछि अब सिउरानीका स्थानीयहरूले डोकोमा गाग्री बोकेर टाढा-टाढा रहेका अन्य स्रोतहरूबाट पानी ल्याउनु परेको छ। यसले स्थानीय समुदायको समय र ऊर्जा अत्यधिक खर्चिन बाध्य बनाएको छ। विशेष गरी महिला र बालबालिकाहरू पानीको जोहो गर्न दिनको धेरै समय बिताउन बाध्य भएका छन्।
पहिले सहजै रूपमा पिउने पानी पाउँथे भने अहिले उनीहरूलाई घण्टौं पैदल हिँडेर मात्र पानी ल्याउन मिलिरहेको छ। भुग्देउ सिउरानीको भूगोल पहाडी र डाडाँमा भएकाले पनि यो समस्या थप गहिरिएको हो। यस क्षेत्रमा खानेपानीको समस्या समाधान गर्न स्थानीय निकायले पहल थाले पनि तत्काल समाधानका लागि ठोस उपायहरू अघि सार्न सकिरहेको छैन।
स्थानीय तहले विभिन्न कार्यक्रमहरू संचालनमा ल्याउन प्रयास गरे पनि यसको दीर्घकालीन समाधान भने अझै बाँकी नै देखिन्छ। खानेपानीको समस्या समाधानका लागि ठूला जलाधार निर्माण गर्न, नयाँ पाइपलाइन प्रणाली जडान गर्न, र बाढीपहिरोले नोक्सान पुर्याएका संरचनाहरू पुनःनिर्माण गर्न आवश्यक छ। अहिलेका लागि सिउरानीका स्थानीयहरूले डोको र गाग्री बोकेर टाढा रहेको खोल्सी वा अन्य ठाउँबाट पानी ल्याउनु परेको छ। स्थानीयहरूले राहतका लागि सरकार र गैरसरकारी संस्थाहरूको सहयोगको अपेक्षा राखिरहेका छन्। विशेष गरी खानेपानीको समस्या समाधानमा केन्द्रित कार्यक्रमहरू संचालन गर्नुपर्छ।
Enter
