ललितपुर । ललितपुरको गाेदावरी नगरपालिका वडा नंबर ३ स्थित शिव बस्ती (ढाँड) मा हुने महायज्ञकाे सम्पूर्ण तयारी पूरा भएको छ ।
आकर्षक शिव धामकाे निर्माणार्थ मंगलबार (भाेलि) देखि शिव बस्तीमा हुने श्रीमद् भागवत सप्ताह ज्ञान महायज्ञकाे तयारी पूरा भएको महायज्ञ मुल आयाेजक समितिका संयाेजक एवं वडा अध्यक्ष राज घिमिरेले जानकारी दिए । पाथीभरा महिला समुहकाे आयाेजनामा शिव बस्तीमा २० फिट अग्लाे महादेवकाे मूर्तिसहित प्रसिद्ध शिवजी धाम निर्माणकाे पवित्र उदेश्यका साथ सञ्चालन हुने महायज्ञ भाद्र २५ गतेदेखि ३१ गते सम्म हुनेछ ।
भौगोलिक तथा धार्मिक दृष्टिकोणले महत्वपूर्ण यस बस्तीकाे विकास र प्रचारप्रसारका लागि शिवधाम निर्माणार्थ महायज्ञ आयोजना गरिएको हाे । भागवत मञ्जरी एवं प्रसिद्ध कथा वाचिका राधिका दासीको मुखाराबिन्दुबाट कथा वाचन हुने महायज्ञमा कथा वाचन मात्रै नभएर भजन, कीर्तन एवं साँस्कृतिक तथा सामाजिक झाँकी समेत प्रस्तुत हुनेछन् । महायज्ञको कलश यात्रा मंगलबार बिहान ७ बजे हुनेछ भने उद्घाटन दिउँसो १ बजे हुनेछ ।
दैनिक रूपमा बिहान ७ बजेदेखि १० बजेसम्म पूजा तथा पाठपरायण, बिहान ११ बजेदेखि ३ बजेसम्म कथा वाचन र साँझ ७ बजेदेखि ९ बजेसम्म माहात्मे तथा सामाजिक झाँकीकाे कार्यक्रम रहेकाे यज्ञ व्यवस्थापन समितिले जनाएको छ ।
