खानीखोला, काभ्रेः काभ्रे जिल्लाको विकट खानीखोला गाउँपालिका–४ स्थित् बाँसघारीकी भीरबाट लडेर गम्भीर घाइते एक महिलाको हेलिकप्टरबाट उद्धार गरिएको छ । विहिबार भीरबाट खसेर गम्भीर घाइते भएकी ४० वर्षीय ग्यान्जामाया लोप्चनको हेलिकप्टरबाट उद्धार गरिएको हो ।
स्थानीय जीवन घिसिङले मनाङ एयरको हेलिकप्टर मार्फत घाइते लोप्चनको उद्धार गरिएको जानकारी दिए । उनका अनुसार लोप्चनलाई उपचारको लागि काठमाडौँस्थित् ट्रामा सेन्टरमा लगिएको छ ।
आफन्त कान्छामान स्याङ्तानले दिउँसो घाँस काट्न जाने क्रममा सिरुटार भीरबाट लडेको लोप्चनको टाउँको लगायत शरिरको विभिन्न भागमा गहिरो चोट लागेको बताए ।
लोप्चन भीरबाट करिब २ सय मिटर तल खसेका थिए । भीरबाट लडेर बेहोस भएकी लोप्चनको अवस्था गम्भीर भएपछि काठमाडौ लगिएको उनको अहिले ट्रामा सेन्टरमा उपचार भइरहेको छ ।
